Манай онлайн дэлгүүрт тавтай морил !

Сагс

Зөвлөгөө

Zoom видео сүлжээний ДАВУУ ба СУЛ ТАЛУУД

04 сарын 15, 2020

Дэлхий даяар коронавирусийн халдвар тархсаны улмаас сая сая иргэн цахимаар дамжуулан зайнаас ажил хэргээ үргэлжлүүлэх шаардлагатай болсон. Үүнтэй холбогдуулан сүүлийн үед ихэнх компаниуд ажил хэргийн уулзалтаа ZOOM гэх видео холболтыг сүлжээг ашиглан хийж буй. Үүний нэг жишээ нь өнгөрсөн оны арванхоёрдугаар сартай харьцуулахад энэ оны гуравдугаар сард Zoom-ын хэрэглээ 20 дахин буюу 200 сая хэрэглэгч хүртэл өсчээ.   

Видео уулзалтын хамгийн хялбар аппликейшний нэг гэгдэж буй Zoom-ын талаар сонирхуулж байна. 

ДАВУУ ТАЛ- ХЯМД бөгөөд ХЯЛБАР 

Эрик Юань гэх ази гаралтай америк инженер залуу 2011 онд АНУ-ын Калифорни мужид Zoom видео холболтын сүлжээ компанийг үүсгэн байгуулсан. 

Цахим хурал, уулзалт зохион байгуулж, видео бичлэгийн бүх төрлийн үйлчилгээ үзүүлдэг Zoom сүлжээ видео конференц, вэбинар хийхэд хямд бөгөөд хялбар шийдэлтэй.  Мөн WebEx, GotoMeeting-тэй харьцуулахад илүү хямд.   

Zoom-ийн хамгийн гол давуу тал бол маш хурдан ачаалдаг. Өндөр хурдны интэрнэттэй, хүчин чадал сайтай нөүтбүүктэй байх эсэхээс үл хамааран таны дуудлагын дүрс, дуу тасрахгүй гэсэн үг юм. Тасрах зөвхөн ганцхан шалтгаан бий. Тэр нь нэг удаагийн дуудлага 40 минут л үргэлжилдэг. Үнэгүй хувилбар нь нэгэн зэрэг 25 хүн дуудлага хийж болох ба богино хугацааны хурал хийхэд маш тохиромжтой апп юм. 


Хэрэглэхэд хялбар. Та апп-ийг татаж авч,уулзалтын шинэ өрөөг үүсгэн холбоосыг нь нөгөө хүн рүүгээ явуулахад л хангалттай. Тэд холбоос дээр дарж нэгдэхэд ердөө 20 секунд л зарцуулна. Уг апп-ийг Андройд болон iOS аль алин дээр хэрэглэж болно. Сарын 15 ам.доллар төлөөд 50 хүнтэй нэгэн зэрэг, дуудлага хийх боломжтой. 

СУЛ ТАЛ - АЮУЛГҮЙ БАЙДАЛ хангалттай түвшинд хангагдаагүй 

Сүүлийн үед дэлхийн өнцөг булан бүрт хувь хүнээс эхлээд төрийн байгууллагын ажилчид хүртэл Zoom видео сүлжээг идэвхтэй хэрэглэж эхэлсэн. Гэхдээ сайны хажуугаар саар гэгчээр “Zoom-bombing” гэх шинэ үзэгдэл бий болов. Тодруулбал Zoom-ын аюулгүй байдлын зохих арга хэмжээг авахгүйгээр ашигласны улмаас видео уулзалт хийх явцад хакеруудын халдлагад өртөх явдал ихэсчээ. Видео уулзалтын үеэр гадны хүн урилгагүйгээр нэвтрэх, ёс бус үг хэрэглэх, ёс бус бичлэг цацах, нууцын зэрэглэлийн мэдээллийг хакердах зэрэг үйлдлүүд гарч байна.

Тухайлбал Английн Ерөнхий сайд Борис Жонсон Zoom видео сүлжээг ашиглан Засгийн газрын гишүүдтэй онлайн уулзалт хийж байх үеэр түүний ID хаяг олон нийтэд ил харагдаж байжээ. Үүний дараа түүний ID хаягийг харуулсан зураг цахим сүлжээгээр тархаж, англичууд тус хаягийг ашиглан Засгийн газрын хуралдаанд оролцох боломжтой гэсэн хошигнол гарсан юм.  


Үүнтэй холбоотойгоор Герман, Тайвань, Оросын Засгийн газраас төрийн үйлчилгээний бүх шатны байгууллагын ажилчдад Zoom видео сүлжээг ажиглахыг хориглов. Zoom-ын нууцлалын бодлого нь хувь хүн болон компанийн нууцлалыг хамгаалж чадахгүй байна гэж үзэж байгаа юм.  

Мөн цахим уулзалт хийх энэхүү зах зээлд хүчтэй өрсөлдөөн үүсгэж буй Zoom видео сүлжээг ажилчид нь ашиглахыг Google компанийн удирдлагын зүгээс бүрмөсөн хориглосон байна.  

Харин Zoom-ын удирдлагуудын зүгээс хакеруудын халдлагад өртөх эрсдэлээс сэргийлэх зөвлөмжийг хүргэв.  

ZOOM-ЫГ ХЭРХЭН АШИГЛАХ ВЭ 

Танд юу хэрэгтэй вэ? 
  • Зөөврийн компьютер эсвэл ухаалаг гар утас  
  • Чихэвч
  • Өндөр хурдны интернет 
  • Тухтай чимээгүй орчин 
Онлайн уулзалтад оролцох заавар:  
  • Таны мэйл хаягаар уулзалт хийх урилга, товлосон цагийн тухай мэдээлэл хүлээн авна.  
  • И-мэйлийг нээж оролцох линкийг дарна. Хэрвээ програмаа урьдчилж татаагүй бол цонхны дээд хэсэгт харагдах Open Zoom Meetings товчийг дарахад програм автоматаар татагдана. 
  • Open Zoom Meeting товч дарж уулзалтын өрөөнд орж ирнэ. 
  • Уулзалт эхлэхэд видеогоо асаах сонголтыг хийнэ.
  • Та товлосон цагт хоцрохгүй холбогдох хэрэгтэй.
  • Хэрвээ уулзалтын дундуур интернэт тасрах гэх мэт ямар нэг шалтгаан гарвал, и-мэйлээр ирсэн урилгын линкийг дарж, Open Zoom Meeting товчийг дараад эргэн холбогдох боломжтой.