Sony компанийн танилцуулсан PlayStation 5 консол

Пүрэв гарагт Sony компани Future of Gaming арга хэмжээнийхээ үеэр видео тоглоомын шинэ консол PlayStation 5-аа товч танилцуулсан юм.
 
Өвөрмөц хэлбэр, хийцтэй шинэ бүтээгдэхүүн нь хоёр хувилбартай байх ажээ. Стандарт хувилбар нь Blu-ray диск уншигчтай байх бол ямар ч диск уншигчгүй, зөвхөн онлайн тоглоом татах, тоглох боломжтой нимгэхэн Digital хувилбар бас гарах юм байна.
 
Өмнөх PlayStation-ий загваруудад ашигладаг байсан HDD хард дискнээсээ салж, 100 GB хүртэл багтаамжтай SSD (Solid State Drive) дискээр тоногложээ. 
 
Мөн өчигдрийн арга хэмжээний үеэр DualSence удирдлагын цэнэглэгч суурь, HD камер, Pulse 3D утасгүй чихэвч, медиа удирдлага зэрэг дагалдах хэрэгслүүдийг үзүүлсэн байна.
 
Эдгээр хэрэгслүүд үндсэн бүтээгдэхүүндээ дагалдах, эсвэл салангид зарагдах эсэх нь одоогоор тодорхойгүй байна. Мөн PS5 хэзээ худалдаанд гарах, ямар үнэтэй зарагдах зэрэг мэдээллийг Sony өгөөгүй юм.
 
Sony компанийн гүйцэтгэх захирал Жим Райан шинэ бүтээгдэхүүнээ энэ оны сүүлээр худалдаанд гаргах төлөвлөгөөтэй байгааг л хэлсэн байна.
 
Тус компани Spider-Man, Resident Evil 8, Horizon Forbidden West тоглоомнуудын шинэ хувилбаруудыг шинэ PS консолдоо зориулан гаргахаар бэлдэж байгаа гэнэ.
 
Sony компани өчигдрийн арга хэмжээгээ зургаадугаар сарын 4-ний өдөр зохион байгуулахаар товлоод байсан ч АНУ-д дэгдсэн арьс өнгөний үзлийн эсрэг тэмцлийн улмаас долоо хоногоор хойшлуулсан юм.

Эх сурвалж: iKON.mn